(وہابیہ کی عیاریاں اور تلبیسات کا افشاء راز)

المستفتی:عبدالوحید چندوسی

الجواب بعون الملک الوھاب

بسم اللہ الرحمن الرحیم۔ نحمد ونصلی علٰی رسولہ الکریم۔

وہابیہ کا اتہام کہ اعلیٰ حضرت قدس سرہ‘ نے علماء اسلام کو کافر کہا ہے کذب محض اور افترا خالص ہے۔ اعلیٰ حضرت قدس سرہ نے ان مفسدین کو کافر فرمایا جو ضروریات دین کے منکر ہوئے۔ ایسوں کو قرآن و حدیث اور تمام امت کافر کہتی ہے اعلیٰ حضرت نے کفر کا حکم اپنی طرف سے نہ دیا بلکہ نصوص نقل فرمائے جن کا آج تک کسی وہابی نے جواب نہ دیا‘ اور نہ کبھی وہ جواب دے سکتے ہیں۔ ان امور کا کفر ہونا اور ان کے قائل کا کافر ہونا خود وہابیہ کو بھی تسلیم ہے۔ مولوی اشرف علی تھانوی صاحب ’’بسط البیان‘‘ میں لکھتے ہیں: ’’جو شخص ایسا اعتقاد رکھے یا بلا اعتقاد صراحۃً یا اشارۃً یہ بات کہے میں اس شخص کو خارج از اسلام سمجھتا ہوں کہ وہ تکذیب کرنا ہے نصوص قطعیہ کی اور تنقیص کرنا ہے حضور سرور عالم فخر بنی آدم صلی اللہ علیہ وسلم کی‘‘۔

اور رہی یہ بات کہ جو اعلیٰ حضرت کا ہم عقیدہ نہ ہو اس کو وہ کافر جانتے ہیں یہ درست ہے اور ہر مسلمان کا یہ عقیدہ ہے کہ

ایمانیات اور ضروریات دین سے جو اس کا ہم عقیدہ نہ ہو وہ کافر ہے۔ جو توحید مانے رسالت میں ہم عقیدہ نہ ہو وہ کافر‘ توحید و رسالت دونوں کو مانے قرآن کا منکر ہو تو کافر ہے۔ غرض کسی ایک امر ضروری سے اگر انکار کرے تو کافر ہے۔ مسلمان وہی ہے جو تمام ضروریات دین میں ہمارا ہم عقیدہ ہو۔ حدیث جبرئیل میں ہے: قال ان تومن باللہ وملئکتہ و کتبہ ورسلہ والیوم الاٰخر وتؤمن بالقدر خیرہٖ و شرہٖ یعنی ایمان یہ ہے کہ تو اللہ اور اس کے ملائکہ اور اس کی کتابوں اور اس کے رسولوں اور روز آخرت کو مانے اور اس کی تقدیر کے خیر و شر پر ایمان لائے تو جو ان امور میں ہمارا ہم عقیدہ ہے مومن ہے اور جو ان میں ایک میں بھی ہم عقیدہ نہیں اس کو حقیقت ایمان ہی حاصل نہیں تو وہ مومن نہیں کافر ہے۔ واللہ تعالٰی اعلم۔

کتبہ: العبد المعتصم بحبل اللہ التمین

سید محمدنعیم الدین مراد آباد

نعت و منقبت کے لئے یہاں کلک کریں